موضع «دوشنبه» در قبال طالبان تغییر نکرده است

«سراج الدین مهرالدین» وزیر امور خارجه تاجیکستان اعلام کرد که موضع «دوشنبه» نسبت به طالبان تغییر نکرده و همچنان بر ضرورت تشکیل حکومت فراگیر با حضور نمایندگان تمام گروه‌های سیاسی و قومی تاکید می‌کند.

به گزارش فارس، مهرالدین اظهار داشت: امروز، جامعه بین‌الملل به طالبان پیام‌های روشنی در مورد ضرورت ایجاد یک حکومت به معنای واقعی فراگیر را می‌دهد. انتظار می‌رود که طالبان در عمل آمادگی خود را برای گفت و گو با رهبران همه گروه‌های سیاسی و قومی، در راستای منافع کل مردم افغانستان نشان دهند. به عبارت دیگر بایستی طالبان تعهد خود را نسبت به احترام گذاشتن به حقوق و آزادی‌های بشر ثابت کنند.

وزیر امور خارجه تاجیکستان، در مورد امنیت مرزهای کشورش با افغانستان، بیان کرد: دولت تاجیکستان با توجه به سطح فزاینده چالش‌ها و تهدیدها، تمام اقدامات لازم را برای تقویت مرزهای جنوبی کشور انجام می‌دهد و در این راستا با سایر شرکای خود نیز همکاری می‌کنیم.

وی با تاکید بر ضرورت تمرکز تلاش‌های جامعه جهانی روی حل سریع بحران شدید انسانی در افغانستان، گفت: تاجیکستان به نوبه خود زیرساخت‌های لجستیکی خویش، از جمله 6 پل در مرز تاجیکستان و افغانستان را برای ارسال کمک‌های بشردوستانه سازمان‌های بین المللی به این کشور همسایه واگذار کرده است. از طریق پست‌های بازرسی مرزی تاجیکستان کمک‌های بشردوستانه‌ای که از سوی سازمان ملل تدارک دیده شده بود، به افغانستان انتقال یافت. همچنین برای شهروندان افغانستان که در مناطق هم مرز با تاجیکستان به سر می‌برند، خدمات پزشکی ارائه می‌شود.

وزیر امور خارجه تاجیکستان در مورد انتقال برق به افغانستان، تصریح کرد: ما بدون وقفه همچنان به انتقال برق به شهر کابل و ولایت‌های شمالی افغانستان ادامه می‌دهیم.

دولت تاجیکستان مصمم به همکاری در امر انتقال کمک‌های بشردوستانه سازمان‌های بین المللی از جمله مواد غذایی به مردم افغانستان است. همچنین در حال حاضر وزارتخانه‌ها و سایر ادارات مربوطه کشور ما در حال تدارک کمک‌هایی برای افغانستان هستند که به زودی انتقال آن آغاز خواهد شد.